अजबच..आता हरणालाही करोनाची बाधा; अमेरिकेत जगातील पहिले प्रकरण

 

लोकनेता  न्यूज

(ऑनलाईन न्यूज नेटवर्क)

 

वॉशिंग्टन: मागील दीड वर्षांपासून जगभरात करोनाचा संसर्ग फैलावला आहे. करोनाच्या संसर्गाला अटकाव करण्यासाठी लसीकरण मोहीम सुरू असली तरी करोनाबाधितांची संख्या वाढत आहे. तर, दुसरीकडे प्राण्यांनाही करोनाची बाधा होत असल्याचे समोर आले आहे. अमेरिकेत एका हरण करोनाबाधित आढळले आहे. हरणाला करोना झाल्याची ही जगातील पहिलीच घटना आहे. या आधी मांजर, श्वान, गोरिल्ला, सिंहाना करोनाची लागण झाली आहे.

अमेरिकेच्या कृषी विभागाने दिलेल्या माहितीनुसार, जंगली पांढरी शेपूट असलेल्या हरणामध्ये SARS-CoV-2 आढळून आला. अमेरिकेतील ओहियो राज्यात हे प्रकरण समोर आले आहे. हरणामध्ये करोनाची कोणतीही लक्षणे आढळली नसल्याचे अधिकाऱ्यांनी सांगितले.

कृषी विभागाच्या प्रवक्त्यांनी 'रॉयटर्स' या वृत्तसंस्थेला दिलेल्या माहितीनुसार, हरणाला SARS-CoV-2 ची बाधा कशी झाली, याबाबत माहिती समोर आली नाही. मानव, हवेतून अथवा हरण किंवा इतर प्राण्यांमधून संसर्ग फैलावला असण्याची शक्यता आहे. माणसांच्या संपर्कात येणाऱ्या प्राण्यांना करोनाची लागण होत असल्याचे याआधीच दिसून आले.

ओहिओतील युनिर्व्हसिटी कॉलेज ऑफ व्हेटेनरी मेडिसिनने जानेवारी ते मार्च या कालावधीत हरणांचे नमुने एकत्र केले होते. त्यानंतर नॅशनल व्हेटनरी सर्व्हिसच्या प्रयोगशाळेत एका हरणाला करोनाची लागण झाली असल्याचे समोर आले.