मुंडे समर्थनार्थ जिल्ह्यात सामुहिक राजीनामा सत्र सुरुच; वरिष्ठ निर्णय घेतील - मुंडे

 * पाथर्डी – शेवगाव पाठोपाठ नेवाशातील कार्यकर्त्यांसह प्रमुख भाजप पदाधिकार्यांचे राजीनामे

लोकनेता  न्यूज

(ऑनलाईन न्यूज नेटवर्क)

अहमदनगर : भाजप खासदार डॉ.प्रीतम मुंडे यांना मंत्रिमंडळ विस्तारात डावलल्याने मुंडे समर्थकांमध्ये टोकाची नाराजी पसरली आहे. त्याचे तीव्र पडसाद जिल्ह्यात उमटले असून गेले दोन दिवसापासुन सुरु असलेले राजीनामा सत्र गतिमान झाले आहे. शेवगाव- पाथर्डी पाठोपाठ हे लोण जिल्हाभर पसरले आहे. दरम्यान काल नेवाशातील ५१  कार्यकर्त्यांनी भाजपा प्राथमिक सदस्यत्वाचे राजीनामे तालुका अध्यक्षांकडे सुपूर्द केले. पाथर्डीत प्रमुख पदाधिकार्यांसह कार्यकर्त्यांनी सामूहिक राजीनामे जिल्हाध्यक्षांकडे सादर केले आहेत.  दरम्यान , कार्यकर्त्यांनी माझ्याकडे राजीनामे दिले आहेत, ते  पक्षाच्या वरिष्ठ पातळीवर पोहोचतील याबाबत वरिष्ठ काय तो निर्णय घेतील  असे भाजपचे दक्षिण जिल्हाध्यक्ष अरुण मुंडे यानी सांगितले.

 नेवाशातील 51 कार्यकर्त्यांचे भाजपा प्राथमिक सदस्यत्वाचे राजीनामे

खासदार डॉ. प्रितमताई मुंडे यांचा  मंत्रीमंडळात समावेश न केल्यामुळे नेवासा तालुक्यातील 51 कार्यकर्त्यांनी भाजपा प्राथमिक सदस्यत्वाचे राजीनामे तालुका अध्यक्षांकडे सुपूर्द केल्याची माहिती लोकनेते गोपिनाथ मुंडे प्रतिष्ठाणचे मुख्य प्रवर्तक राजेंद्र कीर्तने यांनी दिली. भाजपचे नेवासा तालुका अध्यक्षांना दिलेल्या राजीनामा पत्रात  श्री.किर्तने यांनी म्हंटले आहे की, लोकनेते गोपिनाथ मुंडे प्रतिष्ठाण भानसहिवरा यांच्य ५१ (एक्कावन्न) सदस्यांनी भाजपाच्या प्राथमिक सदस्यत्वाचा राजीनामा आपल्याकडे देण्यात येत आहे.

महाराष्ट्राच्या रणरागिणी बहुजन समाजाच्या लोकनेत्या पंकजा गोपिनाथ मुंडे व कर्तव्यदक्ष खासदार डॉ. प्रितमताई मुंडे यांचा मंत्रीमंडळात समावेश न केल्यामुळे आम्ही व सर्वसामान्य जनता नाराज झाली आहे. स्व.लोकनेते मुंढे साहेबांनी सेटजी भटजीचा असणाऱ्या या पक्षाला अहोरात्र कष्ट करुन बहुजनाचा पक्ष म्हणून मान्यता मिळवून दिली. त्यांच्यानंतर त्यांच्या दोन्ही मुलींनी पुढे पक्षाचा वारसा खंबिरपणे पुढे चालवला. तरी पक्षातील काही लोक त्यांच्यावर अन्याय करत असून तो अन्याय आम्हाला सहन न झाल्यामुळे आम्ही सर्व एक्कावन्न सदस्य भाजपाच्या प्राथमिक सदस्यत्वाचा  राजीनामा आपल्याकडे देत आहोत तरी आपण लवकरात लवकर मंजूर करण्यात यावा अशी मागणी ही राजेंद्र किर्तने,सुनिल आव्हाड, बाबासाहेब गोल्हार, रावसाहेब घुले,राजेंद्र दराडे, सुयोग सांगळे,मंगेश नवले यांनी केली आहे.

 पाथर्डी तालुका भाजपा कार्यकर्त्यांचे सामूहिक राजीनामे 

तालुक्यातील भाजपच्या पदाधिकाऱ्यांनी सामूहिक राजीनामे जिल्ह्याध्यक्ष अरुण मुंडे यांच्याकडे सुपूर्त केले आहे.पाथर्डी येथील शासकीय विश्रामगृहात भाजपच्या पदादाधिकाऱ्याच्या भावना मुंडे यांनी जाणून घेतल्या. भारतीय जनता पार्टीच्या पंचयात समिती सभापती सुनीता गोकुळ दौंड,नगराध्यक्ष डॉ मृत्युंजय गर्जे, उपनगराध्यक्ष नंदकुमार शेळके,भाजपा तालुकध्यक्ष माणिक खेडकर, गोकुळ दौंड,माजी नगराध्यक्ष अभय आव्हाड,पंचायत समिती सदस्य विष्णुपंत अकोलकर,जिल्हा उपाध्यक्ष धनंजय बडे,नागनाथ गर्जे, सुनील पाखरे,बाजीराव गर्जे,अभय भंडारी,अंबादास पालवे,युसूफ शेख,आप्पासाहेब शिरसाट,अजित शिरसाट,बाजीराव गर्जे,रामराव खेडकर,सचिन वायकर,बाबूराव बांगर,नारायण पालवे आदींनी राजीनामे दिले आहेत. 

 निवेदनात म्हटले आहे की,भारतीय जनता पार्टी चे प्रामाजिक व विश्वासु पदाधिकारी नुकत्याच झालेल्या केंद्रीय मतिमंडळाचा विस्तार झालेला असून महाराष्ट्रात भारतीय जनता पक्ष तळागाळात पोहचवणारे लोकनेते स्व.गोपीनाथ मुंडे यांच्या कन्या खासदार प्रीतम  मुंडे यांना केंद्रीय मंत्रिमंडळात स्थान मिळाले नसून ही घटना भारतीय जनता पक्षाच्या निष्ठावान कार्यकर्त्यांना धक्का देणारी आहे.तसेच जनसामान्यात याविषयी तीव्र भावना आहेत. पाथर्डी तालुक्यातील या सर्व कार्यकर्त्यांच्या भावना लक्षात घेऊन आम्ही  पदाधिकारी आपल्या पदाचे सामुदाधिक राजीनामे देत आहेत.

भाजपचे जिल्हा उपाध्यक्ष धनंजय बडे यानीही आपल्या कार्यकर्त्यांसह सामूहिक राजीनामे जिल्हाध्यक्षांकडे सादर केले आहेत. " यावेळी बोलताना धनंजय बडे यांनी सांगितले की स्व .मुंडे साहेबांनी तळागाळातील कार्यकर्ता घडविला व समस्त ओबीसी समाजाजाला भाजपाच्या झेंड्या खाली एकत्र आणले. आणि असे असताना त्यांच्या मागे पक्ष्यामध्ये मुंढे भगिनी व समर्थक यांना दुय्यम वागणूक मिळत आहे. पंकजा मुंडे यांना विधान परिषदेवर डावलले होते, त्यामुळे माझ्यासह सामान्य माणसाला सुद्धा असे वाटत होते की प्रीतम ताईंना केंद्रात काम करण्यासाठी मोठी जबादारी मिळेल परंतु केंद्रीय मंत्रीमंडळ विस्तारात ती संधी मिळाली नाही ,त्यामुळे कार्यकर्ते अस्वस्थ झाले आहेत. आणि म्हणून त्यांच्या भावनेची कदर करत आम्ही सर्वांनी मिळून राजीनामा दिला आहे."

सभापती सुनीता दौंड,गोकुळ दौंड,जिल्हा युवामोर्चाचे उपाध्यक्ष अमोल गर्जे,सरचिटणीस सचिन पालवे,रणजीत बेळगे,अर्जुन धायतडक यांनी यापूर्वीच पक्षाचे व इतर पदाचे राजीनामे दिले आहेत. केंद्रीय मंत्रिमंडळात खासदार प्रीतमताई मुंडे यांना स्थान न मिळाल्यामुळे तालुक्यातील व जिल्ह्यातील मुंडे समर्थकांमध्ये प्रचंड असंतोष व नाराजी आहे. त्यामुळे  मुंडे समर्थक कार्यकर्त्यांनी राजीनामा सत्र सुरू केले आहे. या राजीनाम्यामुळे भाजपला चांगलाच धक्का बसणार आहे.

यावेळी भाजपचे दक्षिण जिल्हाध्यक्ष अरुण मुंडे म्हणाले,आज पाथर्डी तालुक्यातील अनेक भाजप कार्यकर्त्यांनी आपल्या पदाचा आणि विविध संस्थावर असलेल्या पदाचा राजीनामा कार्यकर्त्यांनी माझ्याकडे सामूहिकरित्या दिला आहे. पक्षाच्या वरिष्ठ पातळीवर याबाबत ह्या सगळ्या तीव्र भावना पोहोचणार आहे. वरिष्ठ यावर निर्णय घेतील.