पाकिस्तानमध्ये करोनाचे थैमान; रुग्णालयात उपचारासाठी जागाच नाही !

 *आर्थिक राजधानी कराचीमध्ये बाधितांची संख्या वाढली

*करोना डेल्टा वेरिएंटचा मोठा संसर्ग

लोकनेता  न्यूज

(ऑनलाईन न्यूज नेटवर्क)

 इस्लामाबाद: पाकिस्तानमध्येही करोनाच्या संसर्गाने थैमान घातले आहे. भारतात आढळलेल्या करोना डेल्टा वेरिएंटचा पाकिस्तानमध्ये फैलाव होत आहे. पाकिस्तानची आर्थिक राजधानी असलेल्या कराचीमधील रुग्णालयांमध्ये बाधितांवर उपचार करण्यासाठी जागा अपुरी पडत आहे. अनेक रुग्णांना माघारी पाठवले जात आहे. करोनामुळे परिस्थितीती चिंताजनक होत असल्याचे सिंध प्रांत सरकारने म्हटले आहे.

डेल्टा वेरिएंटचा वेगाने संसर्ग होत असल्याने चिंता व्यक्त केली जात आहे. सिंध प्रांत सरकारने म्हटले की, नागरिकांनी खबरदारी न घेतल्यास परिस्थिती गंभीर होऊ शकते. सिंध प्रांताची राजधानी कराचीमध्ये करोनाची बाधा होण्याचा दर २५.७ टक्के इतका झाला आहे. हा पाकिस्तानच्या एकूण दरापेक्षा पाच पट अधिक आहे. पाकिस्तानमध्ये करोनाबाधित आढळण्याचा दर ५.२५ टक्के आहे. पाकिस्तान मेडिकल संघाचे महासचिव डॉक्टर कैसर सज्जाद यांनी सांगितले की, खासगीच नव्हे तर सरकारी रुग्णालयातही परिस्थिती वाईट आहे. या रुग्णालयांमध्येही रुग्ण दाखल करून घेण्यास थांबवले जाऊ शकते.

कराचीमध्ये एकूण करोनाबाधितांपैकी डेल्टा वेरिएंटची लागण झालेल्यांची प्रमाण तब्बल ९० टक्क्याहून अधिक आहे. ईद निमित्त अनेकजण आपल्या गावी परतले आहेत. त्यामुळे करोनाचा संसर्ग फैलावण्याची भीती व्यक्त केली जात आहे. ईद दरम्यान करोना नियम न पाळल्यास बाधितांच्या संख्येत अधिक वाढ होण्याचा धोका आहे.

कराचीतील सर्वात मोठे रुग्णालय जिन्ना हॉस्पिटलचे कार्यकारी संचालक डॉ. सीमिन जमाली यांनी सांगितले की, रुग्णालयातील ९० पैकी ७७ खाटांवर रुग्ण आहेत. करोनाबाधितांसाठी रुग्णालयात आणखी खाटांची संख्या वाढवण्याचे प्रयत्न सुरू आहेत. या वेळी परिस्थिती अतिशय गंभीर असल्याचे त्यांनी सांगितले. ईद उल अजहा आणि पाकव्याप्त काश्मीरमध्ये निवडणुका घेणे हे करोनासाठी सुपर स्प्रेडर ठरण्याची शक्यता आहे. सिंध प्रांतात करोनाच्या संसर्गामुळे ५७५६ जणांचा मृत्यू झाला आहे.