बलात्काराच्या गुन्ह्यात अखेर निलंबित पोलीस निरीक्षकाला अटक

 तोफखाना पोलिसांनी त्यांना नाशिक येथून केली अटक

लोकनेता  न्यूज

 (  ऑनलाईन न्यूज नेटवर्क  )

अहमदनगर :- शहरातील कोतवाली पोलिस ठाण्याचे तत्कालीन पोलिस निरीक्षक विकास वाघ यांना अखेर अटक करण्यात आली. गुन्हा दाखल झाल्यानंतर वाघ यांना निलंबित करण्यात आले होते. त्यानंतर वाघ फरारी होते. तोफखाना पोलिसांनी त्यांना नाशिक येथून अटक केली .

तोफखाना पोलिस ठाण्याचे निरीक्षक सुनील गायकवाड यांच्या नेतृत्वाखालील पथकाने ही कारवाई केली.

कोतवाली पोलिस ठण्यात नियुक्तीस असताना वाघ विविध कारणांमुळे वादग्रस्त ठरले होते. उपनगरातील एका महिलेने त्यांच्याविरूद्ध बलात्काराची फिर्याद दिली होती. तो गुन्हा दाखल झाल्यानंतर पुढेही घडामोडी होत गेल्या. त्या महिलेने काही दिवसांनी आणखी एक फिर्याद देऊन आपल्याला धमकावून बलात्कारा केल्याची फिर्याद दिली होती. त्यावरून तोफखाना पोलिस ठाण्यात गुन्हा दाखल करण्यात आला होता. त्या गुन्ह्यात आता वाघ यांना अटक करण्यात आली आहे.

सध्या विविध गुन्ह्यांत फरारी असलेल्या आरोपींच्या अटकेसाठी पोलिसांनी मोहीम सुरू केली आहे. जिल्हा पोलिस अधीक्षक मनोज पाटील यांच्या आदेशानुसार पोलिस फरारी आरोपींचा शोध घेऊन त्यांना अटक करीत आहेत. वाघ यांचाही तांत्रिक मदतीने शोध घेण्यात येत होता. ते नाशिकमध्ये असल्याचे आढळून आल्याने पोलिस पथकाने तेथे जाऊन त्यांना अटक केली. अटक करताना पोलिस पथकासोबत झटपट झाल्याचेही सांगण्यात येते. सहाय्यक हवालदार सय्यद शकील, अविनाश वाकचौरे, सचिन जगताप यांच्या पथकाने नाशिकमध्ये गुरूवारी सापळा रचून ही अटक केली.

 

ही घटना ११ फेब्रुवारी रोजी रात्री अकराच्या सुमारास सिव्हील हॉस्पिटलमागे आणि मिस्कीन मळा भागात घडल्याचे महिलेने फिर्यादीत म्हटले आहे. आपल्याविरोधात दाखल असलेला गुन्हे मागे घे, असे म्हणत वाघ यांनी मारहाण केल्याचे आणि नंतर अत्याचार केल्याची फिर्याद या महिलेने दिली आहे. आपले मंगळसूत्र व रोख रक्कमही चोरून नेल्याचे फिर्यादीत म्हटले आहे. याप्रकरणी तोफखाना पोलिस ठाण्यात गुन्हा दाखल करण्यात आला आहे. तेव्हापासून फरारी असलेल्या आरोपीला अखेर अटक करण्यात आली आहे. पहिला गुन्हा कोतवाली पोलिस ठाण्यात नियुक्तीला असलेल्या काळात घडला होता. तर दुसरा गुन्हा त्यानंतर निलंबित असताना घडलेला आहे.