रिलायन्सच्या मुकेश अंबानी यांनी केल्या मोठ्या घोषणा..

 

लोकनेता  न्यूज

 (  ऑनलाईन न्यूज नेटवर्क  )

 

नवी दिल्ली: रिलायन्स इंडस्ट्रीज कंपनीचे चेअरमन मुकेश अंबानी यांनी अनेक मोठ्या घोषणा केल्या आहेत. या सभेत रिलायन्सने आपला नवीन स्मार्टफोन जिओफोन नेक्स्टची देखील घोषणा केली आहे. हा फोन जिओ आणि गुगलने मिळून बनवला आहे. या फोनच्या काही फीचर्सबद्दल खुलासा झाला आहे. मात्र, अद्याप फोनची किंमत समोर आलेली नाही. हा फोन केवळ भारतातच नाही जगातील सर्वात स्वस्त स्मार्टफोन पैकी एक असेल असा दावा करण्यात आला आहे. 

फोन व्यतिरिक्त कंपनी ५जी नेटवर्क सुरू करण्यास देखील तयार असल्याचे सांगितले. तसेच, रिटेल सेक्टर आणि ग्रीन एनर्जीबाबत देखील मुकेश अंबानी यांनी काही महत्त्वाच्या घोषणा केल्या. जिओफोन नेक्स्टची विक्री गणेश चतुर्थीपासून म्हणजेच १० सप्टेंबरपासून सुरू होणार असल्याची माहिती अंबानी यांनी दिली. रिलायन्स इंडस्ट्रीची काल ४४ वी वार्षिक सर्वसाधारण सभा पार पडली. यासभेत संबोधित करताना अंबानी यांनी या सभेत कोणत्या महत्त्वाच्या घोषणा केल्या जाणून घेऊया.

सर्वात स्वस्त फोन

मुकेश अंबानी यांनी यावेळी JIO PHONE NEXT ची घोषणा केली. हा फोन Jio आणि Google ने मिळून तयार केला आहे. तसेच, Android OS च्या ऑप्टिमाइज्ड व्हर्जनवर चालेल. याची विक्री १० सप्टेंबर म्हणजेच गणेश चतुर्थीपासून सुरू होईल.

५जी नेटवर्क

मुकेश अंबानी यांनी माहिती दिली की, ५जी इको सिस्टम तयार करणे आणि ५जी उपकरणांची एक सीरिज तयार करण्यासाठी जागतिक भागीदारांसोबत काम करत आहे. भारताला २जी मुक्त आणि ५जी युक्त करण्याची घोषणा देखील त्यांनी यावेळी केली.

१GBPS स्पीड

रिलायन्सचे चेरअमन मुकेश अंबानी म्हणाले की, देशात ५जी नेटवर्क सुरू करण्यासाठी आम्ही तयार आहोत. देशात सर्वात प्रथम आम्ही ५जी सर्व्हिस सुरू करू. याच्या ट्रायलमध्ये १ जीबीपीएस स्पीड मिळाला आहे. यासाठी गुगल क्लाउड आणि जिओमध्ये भागीदारी झाली आहे.

सर्वाधिक भांडवल उभारले

मुकेश अंबानी म्हणाले की, RIL ने एक वर्षात सर्वाधिक भांडवल उभारले आहे. जिओ प्लॅटफॉर्म देशातील सर्वात मोठा डिजिटल प्लॅटफॉर्म आहे. भारतात रिलायन्स जिओ यूजर्सची संख्या वाढत चालली आहे.

 

Jio  दुसरी सर्वात मोठी कंपनी

 

वार्षिक सर्वसाधारण सभेत बोलताना अंबानी म्हणाले की, करोना व्हायरस महामारी संकटात देखील रिलायन्स जिओने शानदार कामगिरी केली आहे. चीनी कंपनीसोडून जिओ पहिली अशी कंपनी आहे, जिचे एकाच देशात ४० कोटींपेक्षा अधिक सबस्क्राइबर्स आहेत. यामुळे जिओ आज जगातील दुसरी सर्वात मोठी मोबाइल डेटा हँडल करणार कंपनी आहे.

रिटेल सेक्टर

RIL  चेअरमन अंबानी म्हणाले की, प्रत्येकी आठ पैकी एक भारतीय व्यक्ती रिलायन्स रिटेलमध्ये शॉपिंग करतो. रिलायन्स रिटेलच्या व्यवसाय वेगाने वाढला आहे. गेल्या वर्षभरात १५०० नवीन स्टोर्स उघडले आहेत. वर्षभरात १८ कोटी कपडे व बुटांची विक्री केली.

Jio Mart

 

पुढील तीन वर्षात ई-कॉमर्स वेंचर Jio Mart वर एक कोटींपेक्षा अधिक मर्चेंट पार्टनर्स जोडले जावे अशी रिलायन्सची योजना आहे. सोबतच, रिलायन्स रिटेल यावर्ष आपल्या स्टोर्सची संख्या देखील वाढवणार आहे.

१० लाख नोकऱ्या

सभेला संबोधित करताना मुकेश अंबानी म्हणाले की, रिटेल सेक्टमध्ये रिलायन्स ३ वर्षात जवळपास १० लाख लोकांना नोकरी देईल. गेल्या वर्षभरात रिलायन्स रिटेलने ६५ हजार नवीन नोकऱ्या निर्माण केल्याचे देखील त्यांनी सांगितले. आता कर्मचाऱ्यांची संख्या दोन लाखांपेक्षा अधिक झाली आहे.

१५ हजार कोटींची गुंतवणूक

 

रिलायन्स वॅल्यू चेन पार्टनरशिप आणि फ्यूचर टेक्नोलॉजीसाठी १५ हजार कोटींची गुंतवणूक करणार असल्याचे देखील मुकेश अंबानी यांनी वार्षिक सर्वसाधारण सभेत सांगितले.

ग्रीन एनर्जी

मुकेश अंबानी यांनी माहिती दिली की, ग्रीन एनर्जी सेक्टरमध्ये रिलायन्स ६० हजार कोटी रुपये गुंतवणूक करणार आहे. पुढील १० वर्षात कंपनी १०० गीगा वॉट सोलर एनर्जीच्या उत्पादनाचे लक्ष्य आहे. यासाठी गुजरातच्या जामनगरमध्ये धीरूभाई ग्रीन एनर्जी कॉम्प्लेक्स उभारले जाणार आहे.