कोव्हिशील्ड लशीचा दुसरा डोस आता 'इतक्या' दिवसांनंतरच !

 

लोकनेता न्यूज

( ऑनलाईन न्यूज नेटवर्क  )

 

नाशिक : ज्या नागरिकांनी कोव्हिशील्ड लशीचा पहिला डोस घेतला असेल, त्यांना आता ८४ दिवसांनंतरच दुसरा डोस देण्यात येणार असल्याची माहिती जिल्हा परिषदेच्या आरोग्य विभागातर्फे देण्यात आली आहे. कोव्हिड प्रतिबंधक लशींच्या तुटवड्यामुळे जिल्ह्यातील विविध लसीकरण केंद्रांवर नागरिक रोजच हातघाईवर येत आहेत. एकदा लस घेतल्यानंतर दोन डोसमध्ये नेमके किती अंतर असावे, असा प्रश्नही ग्रामस्थांना सतावतो आहे.

 या पार्श्वभूमीवर जिल्हा परिषदेने स्पष्ट नियोजन जाहीर केले आहे. ग्रामीण भागात लशींच्या तुटवड्यावरून नागरिकांत मोठ्या प्रमाणावर नाराजी पसरली आहे. लॉकडाउन असूनदेखील रोजच या केंद्रांवरील गर्दी नियंत्रणात आणताना यंत्रणेच्या नाकीनऊ येत आहेत. या स्थितीत लसीकरणाबाबत केंद्र व राज्याकडून मिळालेल्या नव्या सूचनांनुसार कोव्हिशील्डच्या लशीबाबत नवीन निर्देश देण्यात आले आहेत. ज्यांनी यापूर्वी कोव्हिशील्ड लशीचा पहिला डोस घेतला आहे अशांना दुसऱ्या डोसचे अंतर सहा ते आठ आठवड्यांवरून बारा ते सोळा आठवड्यांवर करण्यात आले आहे. कोव्हिशील्डचा पहिला डोस घेणाऱ्या लाभार्थींना ८४ दिवसांच्या अंतरानंतरच दुसरा डोस देण्यात येणार आहे.

'कोव्हॅक्सिन' चार आठवड्यांनंतरच
दरम्यान, कोव्हॅक्सिन लशीच्या दुसऱ्या डोसबाबत नियमांमध्ये कोणत्याही प्रकारचे बदल करण्यात आलेले नाहीत. त्यामुळे कोव्हॅक्सिनचा दुसरा डोस पूर्वीप्रमाणेच चार आठवड्यांनी देण्यात येणार आहे. याशिवाय वयोगट १८ ते ४४ मधील लाभार्थींचे लसीकरण थांबविण्यात आले आहे. त्यामुळे या निकषांमध्ये बसणाऱ्या पात्र लाभार्थींनीच ऑनलाइन नोंदणीच्या कन्फर्मेशननंतरच लसीकरण केंद्रावर जावे, असे आवाहन जिल्हा परिषदेचे अध्यक्ष बाळासाहेब क्षीरसागर, मुख्य कार्यकारी अधिकारी लीना बनसोड, आरोग्य सभापती सुरेखा दराडे, जिल्हा आरोग्य अधिकारी डॉ. कपिल आहेर यांनी केले आहे.