बाळ बोठेच्या खिशात सापडली एक चिठ्ठी !

 पोलिस अधीक्षक पाटील यांची माहिती

लोकनेता न्यूज

( ऑनलाईन न्यूज नेटवर्क )

अहमदनगर : यशस्विनी महिला ब्रिगेडच्या अध्यक्षा रेखा जरे यांच्या हत्याकांडातील मुख्य सूत्रधार पत्रकार बाळ बोठे याच्याकडे एक चिठ्ठी आढळून आली असून आपला कोणत्याही प्रकारे मृत्यू झाल्यास यांच्याशी संपर्क साधावा, असे सांगून नातेवाईकांचे नंबर त्यावर लिहून ठेवलेले आढळून आले. दरम्यान आरोपी बोठे याची कोणतीही बडदास्त ठेवली जात नसून केवळ आरोपीची सुरक्षा आणि संभाव्य कायदेशीर वाद टाळण्यासाठी उपाययोजना केल्या जात असल्याचे स्पष्टीकरण जिल्हा पोलिस अधीक्षक मनोज पाटील यांनी नगर येथे झालेल्या पत्रकार परिषदेत दिले.

रेखा जरे यांचा मुलगा रुणाल यांनी आरोपीची बडदास्त ठेवली जात असल्याचा आरोप करीत आत्मदहन करण्याचा इशारा दिला होता. पोलिस अधीक्षक पाटील यांनी यासंबंधी पोलिसांची बाजू पत्रकारांसमोर मांडली. त्यांनी सांगितले की, हैदराबादमध्ये कारवाई करताना पोलिस आल्याचे आरोपींच्या लक्षात येऊ नये, यासाठी खासगी गाड्या वापरण्यात आल्या होत्या. तेथून आरोपीला नगरला सुरक्षित आणणे हेही आव्हानात्मक काम होते. त्यामुळे पळून जाण्याची संधी न मिळता सुरक्षित प्रवास करता येईल, अशी गाडी वापरण्यात आली. यात आरोपीची बडदास्त ठेवण्याचा कोणताच विषय नाही. आरोपी पत्रकार आणि वकील असल्याने त्याच्याकडून कायदेशीर पळवाटा शोधण्याचा सतत प्रयत्न होत आहे. त्यामुळे पोलिसांनाही कायदेशीर पद्धतीनेच काम करावे लागत आहे.

कोणताही बहाणा, बनाव करता येऊ नये यासाठी स्वतंत्र पोलिस कोठडीत ठेवण्यात येणार असून तेथे सीसीटीव्ही कॅमेरे लावण्यात येणार आहेत. आरोपी पत्रकार आणि वकीलही आहे. त्यामुळे कायद्याच्या माहितीचा स्वत:ची सुटका करून घेण्यासाठी त्याच्याकडून पुरेपूर वापर केला जात आहे. अटक झाल्यापासून त्याने आरोग्याच्या तक्रारी सुरू केल्या आहेत. छातीत दुखत असल्याची, घाम येत असल्याची तक्रार केल्याने त्याची रस्त्यातच सोलापूर येथील रुग्णालयात तपासणी करण्यात आली.

याशिवाय बोठे याच्याकडे एक चिठ्ठी आढळून आली. त्यावर आपला कोणत्याही प्रकारे मृत्यू झाल्यास खालील व्यक्तींशी संपर्क साधावा, असा मजकूर लिहिला होता. थेट कोणावर आरोप अगर कोणाला जबाबदार धरण्यात आलेले नसले तरी तरीही तीही एक पुढील कायदेशीर तयारी असू शकते, असा संशय असल्याचे पोलिस अधीक्षक पाटील यांनी सांगितले.

आरोपी बाळ बोठेने पोलिस आणि कायद्यापासून बचावाचा पुरेपुर प्रयत्न केल्याचे आढळून आले. इकडे मालमत्ता जप्तीची कारवाई अंतिम टप्प्यात आलेली असल्याने त्यातून मार्ग काढण्यासाठी त्याने राचकोंडा पोलिस आयुक्त कार्यालयात आपण गेल्याचे दाखवून देण्यासाठी तेथे जाऊन केवळ नोंद केली, मात्र आतमध्ये न जाता निघून गेला. तेथे मूळचे नगर जिल्ह्यातील महेश भागवत पोलिस आयुक्त आहेत. मात्र, त्यांची भेट घेतली नाही. केवळ तेथे गेल्याचे भासवून आपण फरारी नसून कायदेशीर प्रयत्न करीत आहोत, हे न्यायालयात दाखविण्याचा प्रयत्न असावा, असा संशयही पाटील यांनी व्यक्त केला.

बोठेच्या अटकेची सहा पोलिस पथकांनी कारवाई केली. त्याबद्दल त्या पथकांचा पोलिस अधीक्षक पाटील यांनी सत्कार केला. त्यांना प्रमाणपत्र आणि रोख बक्षीसेही देण्यात आली. अतिशय कौशल्याने पोलिसांनी तपास केला असून यापुढेही नि:पक्ष आणि कायदेशीर पद्धतीनेच तपास केला जाईल. इतर आरोपींना कायद्यानुसार जी वागणूक दिली जाते, तीच याही आरोपींना दिली जाईल, असेही पोलिस अधिक्षक पाटील यांनी पत्रकारांशी बोलताना स्पष्ट केले.